Google+ You Tube Linkedin Twitter Facebook

Content on this page requires a newer version of Adobe Flash Player.

Get Adobe Flash player

تحت رعاية
الأمير طلال بن عبد العزيز آل سعود
المشرف العام ـ رئيس التحرير عبدالمنعم الأشنيهي |مديرالتحرير محمد عبد الرحمن
أحدث الأخبار :
بحبها زي ما هي

شادية محمود



الأحد 07-01-2018

بحبك يا مصر زى ما أنت كده لأن يا أخي هي مصـــر كده ، ربنا خلقها كده ، وأوجدها كده ، وأنشأها كده ، وحفظها كده ، وهتفضل كده ، وكده هو سر شفرتها العاصية على الفك أو الفهم ، وهى سر طعامتها واختلافها عن باقي دول العالم ، ماتقولش القرد فى عين أمه غزال ، تعالى نشوف ترجمة كده إيه وبعدها أحكم هتحبها زى ما هى كده ولا لا.

تسمع أذان على مئذنة.. وبعدها تسمع جرس كنيسة ، تدفن شهيد بالزغاريد وبعدها تسمع أغنية العيد ، هي مصـــر كده رئيسها أمام العالم كله لا يهمه ، ويهتف فى قلب الأمم المتحدة تحيـا مصـــر، و تلاقى كل الحاضرين وقفوا احتراما لاسم مصـــر هي مصـــر كده..

أم صابر ، صاحبة مشنة الفجل ، تعمل جمعية علشان تدفع مصاريف بنتها فى الكلية ، وتلاقى ابنها الكبير يبوس إيدها وعلى  كتفه دبورة الحربية.. هى مصـــر كده.

تفطر رمضان على طبق ملوخية من إيد أم جرجس والطبق يرجع تانى مليان كنافة بالشعرية٠٠ هى مصـــر كده..

الأهلى نادى القرن الزعيم ملك الكرة ، الزمالك أحسن والأهلي بالحكام والإعلام دايما يكسب ٠٠٠هى مصر كده

تلاقى أهلاوي بيمسك في زمالكاوي ، وتاني يوم حاضنين بعض بعلم مصر ٠٠هي مصر كده .....

 بضحكتها وقفشاتها ودمعتها وبكاءها ، بصعيدها وفلاحها ، بطيبتها ولؤمها ....هي مصر كده ....

 بإن شاء الله ،  ومعلش ، بإذن الله ، وماتزعلش ، وباللي راح ومرجعش .....هي مصر كده ....

 بزحامها وخناقها ، باللي حاميها واللي سرقها ، وبأهرامها ومن أنشأها ....هي مصر كده .....

يخونها إخوانها ، وتعلمهم ،  يشتمها ولاد عمها وتداويهم ، وإن قالوا " أى " ، تكون أول من يحضنهم ويحميهم ..هي مصر كده ....

تلعن مرورها وزحامها  وترابها ، ولما تبعد ، ترجع تتمرمغ فيهم .... هي مصر كده .....

فيها فشل وساعات نجاح ، وفيها محمد صلاح اللى مشرفها ، وعم صلاح البطل اللى بيقول عليه الخرفان سوابق ، فاكرين البطولة والشهامة خيانة ٠٠٠هي مصر كده .....

بلد الفول والطعمية ، والبيروقراطية ، وشهقة الملوخية ، يا تحبها ، يا تسببها زي ما هى ٠٠٠٠هي مصر كده ٠٠٠٠

هواها معفّر ، وسحابها أسود ، لكن ألوان الدنيا ما تسوي بهجة تمشية علي نيلها ...هي مصر كده ....

الدقون مالية الشوارع ، والحجاب ، والجلباب شايع ،لكن أجازتنا وبهجتنا بأعياد الميلاد من القلب طالع ٠٠٠هي مصر كده

ربك خلقها كده ، و حافظها كده ، وقال أنها حتكون آمنة كده .....

إحنا كده المصريين ، مسلمين مسيحيين ، صابرين ، صامدين ، مصليين ، حامدين ، شاكرين  ، راكعين ، ساجدين ، مصلبين ، راضيين ، قانعين ، سعداء ، مبسوطين ، واثقين ، تعدى علينا المحن وإحنا دايما واقفين  ، ما انت يامصر لينا ضهر ، ولا انكسر لنا عود ، ولا هيكون ، أهل بيت النبى مدفونين فى ترابك ،. ورحلة العيلة المقدسة كانت إلى أرض النور ، واحتفال شعب مصر بمرور رحلة العذراء مريم وطفلها هربا من شر الامبراطور كان تاريخيا ، وعشان  كده دائما بأمر الله منصورين ٠٠هي مصر كده .....

زى ما قال صاحبي ، لو معاك جنيه أو قرش ، كشري أو سوشي حاتتعشي ، بس سيبها علي الله ما تحسبش ، عرفتوا ليه بحب مصر ، بحبك يا مصر زى ما أنت  كده ، كل سنة وأنت طيبة يا مصر يا هبة النيل ، كل سنة وأنت طيب يامصـــرى مسلم أو مسيحى  ، كل سنة وأنت طيب معايا كل سنة وكلنا طيبين.

أضف تعليق